Терроризм-вабои аср
Дар шароити ҳозира вазифаи ҳар як фарди ватандӯсту ватанпарвар алалхусус ҷавонон, ки ҳамчун нерӯи асосии пешбарандаи ҷомеа маҳсуб меёбанд, аз он иборат аст, ки бар зидди терроризм мубориза бурда хушёриро аз даст надиҳанд Истилоҳи «терроризм» (аз калимаи лотинии «tеrrоr») маншаъ гирифта, маънояш «тарс ва ваҳм» аст. Террористон мехоҳанд, мақсаду мароми худро бо роҳи зӯроварӣ, куштор, тарсу ваҳм амалӣ созанд.
Бехабар будан аз маърифати ҳуқуқӣ ва худшиносӣ, таълиму тарбияи нокифояи насли наврас, хусусан ҷавонон, боиси шомил шудани онҳо ба гуруҳҳои ифротгаро гардида истодааст. Дар чунин вазъият ҳар як фарди соҳибмаърифат ва бахусус падару модарро масъулияти азим мебояд, зеро аҳамияти ҷиддӣ зоҳир намудан дар тарбияи насли наврас ва ҷавонон яке аз омилҳои мубориза бар зидди терроризм ва ифротгароӣ маҳсуб меёбад.
Мо ҷавонон бояд аз шомил шудан ба гурӯҳҳои ифротӣ худдорӣ намоем, зеро дар натиҷаи шомил шудан ба ин гуна ҳизбу ҳаракатҳои радикаливу террористӣ ҳам ҷони худро аз даст медиҳем ва ҳам сабаби аз байн бурдани ҷони ҳазорон нафарони дигар мегардем. Ҳар як шаҳрванд, ҳар як фарди ин ҷомеа барои ҳифзи истиқлолият ва якпорчагии кишвар талош варзад. Зеро ояндаи халқу миллати тоҷикро бе мавҷудияти давлати миллии тоҷикон тасаввур кардан ғайриимкон аст.
Омӯзгори фанни забони русии
МТМУ №3 ба номи Н.Ҳотамбоев Мустафоқулов Эралӣ
.jpg)